تذكّر أي شي عنّي ..! - صالح عبدالكريم
حبيبي
بذمّتك وينك ..؟
نشف دمّي
وأنا اناديك ..
حبيبي منت مثل أول
تغيّر كل شي ٍ فيك ..
وانا اللّي كنت أقول الليل
يا ربي بغيبتك .. بارد
آثر حتى النهار.. بارد
وّجه السالفه .. بارد
وّقتي كل ما أزوره
لقيته منتهي و ..بارد
..ولا باقي لي .. إلا أمرين :
. يا أقطع غصن من صدرك !
. يا تحيي دنيتي و أحييك !
حبيبي منت مثل أول
تغيّر كل شي ٍ فيك ..!
ترى اللّي بيني و بينك
مهي عشرة كلام وبس
غيرك ما ملا عيني
وغيري ما خلق بك حس ..
بربك أرفق بحالي :
نسيت حكايتي و شمعي
وكيف إن السهر دمعي
وكيف أهديت لك كلّي
عيوني .. حكيي .. سمعي ..!
حبيبي منت مثل أول
تغيّر كل شي ٍ فيك ..!
تذكّر أي شي عنّي
تذكّر يوم كنت تقول :
أحبّك .. كل ما تضحك .. أحبك زود
واحبّك لا قعدت تقلّد الأطفال .. بسواليفك
أحس ان ودّي أضمّك ..
وأعاندك :
وأقولك : صح أنا ماما مؤدب صح
بس مدري طلعت .. لمين ..!
تقولي : إيه .. طلعت لأمك ..!!
تذكّر أي شي عنّي
تذكّر يوم كنت تقول :
كل ما جيت ابيّن لك غلاك ..
يخونني التعبير
يا ليت أحبّك تكفّي
يا ليت أوصل بك لشفّي
وربي إني أشوفك غير
يا ليت ما تنّطق بعدك
صباحك يا حبيبي خير ..
تذكّر أي شي عنّي
تذكّر يوم كنت تقول :
حرام .. شذنبك أتضايق
وتتضايق .. من أسبابي !
أنا كلّي خجل منّك ..
وأقولك :
ما تعرف إني : بقايا طيب أعرابي
أنا مالي غنى عنّك
أنا لو يلحقك .. مكروه
أبيع بوقفتي ثيابي ..
حبيبي منت مثل أول
تغيّر كل شي ٍ فيك ..
نسيت إن السهر : أحلام
إلى شفتك كذا .. منضام
أجيك من .. آخر ضلوعي
أجيك من أطرف الأيام .!
وأمسح دمعك و كحلك
وأحط إيدي وساده لك
وأقولك :
بس حبيبي نام
عشاني بس حبيبي نام ..!
حبيبي راحت الدنيا .. ورحت
وجت .. وانا ما جيت !
تلمّستك هناك وهمت
تحسستك .. أحسبك نمت ..
وقمت أمسح على شعرك
آثرني واهم بطيفك
وآثر قلبك : حسافه ميت ..!
حبيبي منت مثل أول
تغيّر كل شي ٍ فيك ..!!