بعثري كل السوالف..! | صالح عبدالكريم

هذا انا جيتك وجبت من المشاعر كل ما يكفي لجل يكسي سما ليلي معاك

اسرفي ما دام نفسك تهتوي شوفي وشوفي من بدايات المحبه يهتوي نفس الشعور

كل نبضه في خفوقي خانها الوقت بغيابك كسّرت برد الضلوع يوم حسّت في دفاك

وكل دمعه امطرت من غيمة عيوني تمنّت لو على يدّك تهاوت اوعلى شالك تثور

يا غناتي والهوى اللّي هِمت فيه وهام فيني إستخار عن الدروب الماضيه والحين جاك

في شكل حي ِ تمثّل لا تهابينه تراه من الغلا والشّوق اصبح يا بعد عمري جسور

من عرفتك ما عرفت إلا البياض اللّي غشى عين الكفيف وصرت ما امشي بلاك

اسألك بأ للي خلقنا تحفظين القلب عندك لو حصل منّي ملامه او حصل منّي قصور

والله انّي صرت اشوف الكون بعيونك واصافح من هدبك الليل واتنفس غلاك

واسرق اللحظات لجل إنّي اناجي طيفك الحاظر مدامي عن سما الوصل معذور

برخص الونات لجلك وامتطي صهوة خيالي علّني المس ولو طارف سماك

ما بقى ب الارض بعدك غير ريح ٍ تحمل اسراب الاماني لين ندفن ب القبور

هذا انا جيتك تعالي بعثري كل السوالف واصرخي فيني احبك وش حلاها من شفاك

بعدها ما عاد والله تفرق سنيني سواءً كنت بين الناس ولا منفّي ٍ بين السطور ..!!