فيك عذري - صالح عبدالكريم
مدري وربي كيف آصف غلاتك
قبلك سألني خاطري وقلت مدري !
كني لمحت بسلم الأجواد ذاتك
وكنّك خذيت من الدعاء كل أجري
ذرب المعاني والوفا من صفاتك
تطري على بال المواعيد وأطري
منّاك شفني ساجد ٍ في صلاتك
ومنّا مثل ما يستر الذنب فجري
ومنّاك اقرب من ظماك لّهاتك
ومنّا تراني ب المواجيب محري
والضحكه اللّي تنكسر من شفاتك
يكسف سناها لا تحاليت شعري
اموت لا من قلت لك وش حلاتك
وجرّت عيونك جاوبت : إيه ادري
وتموت لا من قلت لك من سكاتك
مع السلامه ! وصحت لي وين بدري
واتوه بين مقابلك و التفاتك
واهيم لا طيفك غفى فوق صدري
ليت السعاده والهنا في حياتك
ياصل عنانه للسما وفيك عذري :
إنّك بقلبي ما تزعزع ثباتك
وإنّي بقلبك عارف ٍ كيف قدري !!