عبث طاووس - أحمد المطوع
تصبّ الجوع في عيني مطر .. واقول زيديني
كذا و بكِلْ برود اضحك .. كأني واحدٍ ثاني !
تحاول قدّ ما تقدر .. تبعثر ما بقى فيني
و احاول قدّ مافيني ألملمني على شاني !
تمررني على ذاك اللهب .. بشويش تسقيني
رذاذ التوت ذوّبني .. و خمر التين سجّاني !
تغنّيني على لحن الطيور .. تعود تحييني
و تتعملق كذا ب صدري .. ملامح تعْقِد لساني !
تِنَرْجِسْني عَبَث طاووس .. ثمْ ترجع تورّيني
مكاني بين قوسين وحنايا .. هذا عنواني
لئيمة .. تَعَرْف شلون إلى غابت تخلّيني
أغنّيها و اغنيني .. و ارتّل أعذب الحاني
ترتبني و تآخذني .. ل خلف الشمس ترميني
طويلة رحلة الطاووس .. خطير المشهد الثاني !!
شَغَبْ أطفال تكتبني .. ب جرّة رمش تمحيني
وانا واقف على حدّ الهدب .. يمكنّي القاني
و ادوّرني ورى ه التوت اناديني : أنا ويني
أليمة فكرة الموقف .. إذا قلبي تحدّاني
كذا غنّيتها البارح .. كذا كانت تغنّيني
عناقيد الرجا تزهر .. لا قالت لي : على شاني