لولا الملامة - أسعد السحيمي
لولا الملامه وخوفي الناس يدرون
لكتب على جدران بيتك أناني
وأنظم قصيده وأجعل القاف موزون
فيها من الشلفات فكر ومعاني
وابدآ بقصه زلزلت قلب مفتون
عنوانها ( أكبر غلط في زماني )
قربك وحبك والنظر في هالعيون
حلم ٍ حلمته وصرت منه أعاني
وسرّ الهوى من بيننا كان مدفون
ما يعلمه ياكود خالق لساني
حسدت نفسي وصرت هايم ومجنون
وأعطيتك أحسن من مكانك مكاني
وحسّنت ظني فيك والشك مغبون
ماله مكان بداخل القلب فاني
وأنكرتني يوم ( الزمن ) فاقد النون
وجرحت في خنجر غلاك المحاني
وخليت أطفال المحاني يصيحون
وأثر البلى في قلبك اليوم (ثاني)
صرت أتلفّت من بقالي بهالكون
غير السراب يقول انه بقاني
ماغير أنا وقطرات دم ٍ يهلون
وفكر ٍ عوج أليا عزمت يعصاني
ليه الوفى والصدق عندك يهونون
ليه الهجر يقطع طريق الأماني
وليه الغدر ويّآ الخيانه يهنون
(شيطان فكرك) لاتمرد وجاني
ياشيخ انا الغلطان فكره ومضمون
رميت قلبي بين يَدّين جاني
ماكفّته جرح المشاعر ولا حزون
هدّت صروح الحب داخل كياني
كبّر صغيره وإختلق شك وظنون
حتى من النظره البريئه نهاني
أصدر قراره للأسف كان مشحون
وخلاني في صفحات سود وطواني
تبي الصراحه روح ماني بمسجون
والقلب للي بالمحبه شراني