مجرد أقنعة - أغراب
تناثرت كل الملامح وانكسر وجه الغرام
ثم امتلت كل الشوارع من وجيهك أقنعه !
وجهٍ تناثر .مع هشيم الريح وجنوبه حطام
وجهٍ تبعثر بانكسارك وانحنى في : مرتعه !
وجه ٍ توارى خلف غيمات المساري واللثام
وجه ٍ تلاشى مع طيوف ٍ بالمحاري مفجعه !
كل المدينة من سواتك لفّها ثوب الظلام
ولاّ الرصيف اللي جرحته والمراكب مسرعه !!
مدري ! عيوني أجحفت ! ولا احتوى صدري غمام !؟
ما عاد اشوف ! الا وجيه ٍ تنكسر في معمعه !
يا صاحب الحب الذي فيه الهوى حده كلام
فيك العشق كله ثواني وذكريات ٍ ممتعه!
لو يمدحونك بالمثالي وانك الحر ّ القطام
لو يحسبونك للملا أسمى دليل ِ نتبعه !
أنت الذي خان وتمادى والتحف ثوب الوئام
أنت الذي قوله مبادىء والفعايل تخدعه !
منذ متى والكذب شيمه من شيّم بعض الكرام !!
منذ متى والغدر زاده في دروبك أمتعه !!
أبحرت في لجّة عيونك أرتوي منك الهيام
ليت السفينة مابحرت من غير زاد وأشرعه !
من يوم انا فتحت عيني و انت لي زاد وفطام !
صعبه ! على المولود يحيى دون زاد ٍ يشبعه !
أكبر ويكبر داخلي حلمٍ ٍ على جفني ينام
كنّي أسير ٍ يحتري صبحٍ ٍ يناجي مصرعه !
الله يعين القلب كنه شايل ٍ هم الأنام
من صدمة ٍ خلّت جروح الليل فيني مبدعه !
هزتني الدمعة وانا اللي لو ذرفتك كل عام
تنثرني العبره ووجهك لو يسامح أجمعه !
والحاجه اللي في يدينك مالها أي اهتمام .
دام الحقيقه مالها في سر ّ ذاتك منفعه !
قبل الرحيل استأذنك !! في كلمتين وباحترام
مدري !! على سمعك تمر ّ ! ولا بقلبك موجعه !!
مدامك انت اللي كذا !! أجل : على الدنيا السلام
وكل الوجيه اللي تقابلني مجرد أقنعه !