الحاجة والرجل - بدر غازي
الحاجه اللي تحد الرجل ياجعله
لاحدته ماتحدّه غير للوافي
اسهل على الرجل قبل اهانته قتله
واخير مانطلبه ستر الله الضافي
يالله عسى رميتي يوم الرمي عدله
ان كان ماصابت انبّه بها الغافي
فان قدمتني فانا عنتر وهي عبله
ولا للسنافيه الا بندق اسنافي
وان كان ماقدمتني فاول الحفله
لاخير بك يافراشٍ ماله الحافي
ياخوي لاهنت كيف اسلم من العزله؟
انا وذيب الخلا واهلي وميقافي
ما للفتى فاصعب الحزّات كود اهله
وانا ولو ضاق دربي ما ارجع اخلافي
يارجل قدمك دروبٍ ماهي ابسهله
شئٍ ماينشاف والا شئ ينشافي
والرجل مايحرجه شئٍ كثر جهله
وان فات الاوان مافاد التحسّافي
كلٍ على حسْب فعله ينذكر فضله
والوزن يفرق مابين اثقال واخفافي
الله يعزّ النخل يازارع الاثله
ما انته بجاني (تمر)لوكنت خرّافي
الوقت ميدان وايام الزمن اكله
احدٍ موقّي قدم رجله واحد حافي
وسود الليالي تحد الادمي لاجله
واللي رحل مايكفّي عنّه اللافي
امنت باللي قضاه ايحل في وهله
اللي قسم للعباد ارباع وانصافي
من دونه الادمي ضاقت به المهله
والادمي له نصيبه مابه اخلافي
ماينكتب له ولو الناس جو قبله
ما احدٍ بياخذْهْ غيره والله الكافي