لاتحايد - تركي حمدان العنزي
لاتحايد لاتحايد ولو هي بالعناد
العناد ارحم ولا الوقفة المستنكرة
الف درب تستفزك ولااظنك جماد
والله ان بعض الجماد يتخيّر مكسرة
والشجر إنسان لكنه اوغل بالحياد
قل معي : ملعون شخص تشبّه بشجرة !
كيف عقب الطيش والعيش في جرح وضماد
يصبح اللي لا رموه بحجر طش ثمره !؟
عاد وان قلت: الشجر جاد قلنا: كيف جاد ؟!
دون أن يملك على منع جوده مقدرة !؟
من عجز عن بخل ما للكرم فيه امتداد !
مثل ما القدرة على الثار ساس المغفرة !
يارفيقي واستمع لي وخذ علم وكاد
لايغرك مايقولونه اهل البربرة !
انتهى الماضي وجينا مع علوم جداد
تنتمي للعقل ماتنتمي للمقبرة !
الكرم لو كان بذل النفايس للعباد
كان ما ست الصبايا تسمى الجوهرة
الكرم : أن ترخص الشمع في عز السواد
الكرم : أن تمنع الدمع عن وجنة مرة
والكريم : اللي عطى النوم لعيون السهاد
والشجيع : اللي غفى ما تذكر خنجره !
والله ان اللي يحسب الشجاعة بالزناد
مثل من يحسب حلاة الحديث الثرثرة !!
وانت تدري قلة الهرج من كثر الرشاد
غير شِعري لو كثر بالرشاد استكثره !
إيه شاعر واطلب الصفح عن ذنب المداد
في بلاد ساوت الشعر باكواز الذرة !!
والله اني ما حرثت الورق وارجي حصاد
مير شفت الارض ترزح تحت ثقل صخرة
واذكر اني شفت قلبي وعشقه بازدياد
واذكر اني لين هالحين فكري بعثرة
لجل هذا أكتب الشعر واذم الحياد
ولجل هذا قلت هالشطر ليتك تذكره
الشجر: انسان لكنه اوغل بالحياد
قل معي : ملعون شخص تشبّه بشجرة !