عروس البحر - حابس المشعل

وإن مّرني منك ليل ٍ مايخاف النور
من وين أجيب لعيوني دمع وأبكيلك؟!

لاتسافر الما يموت وينشف العصفور
والريح تصمت وذيبة رملي تعوي لك!

محتاجك أكثر من أوقف والسنين: تدور
وأكثر من إني تعب كل ليله أسري لك

محتاج أفضفض لقلبك عن ثلاث شهور
وعن حلم عاري لقى حتفه يغني لك

كل مانسيتك ذكرك الخاطر المكسور
ياسخف عذري وياحظ أضلعي بويلك!

جرّب تنام بيديك ولامعاك غرور
للهجرّب ثواني وشف شسوي لك:

بهديك باب ودُعا/خفّاق/شعر/طيور
يمكنك شوي تدري شكثر حبي لك!

والبارحه ماهجدت ولاحوتني الدور
ماغير أشّتم غيابك وأرجع أشكيلك!

بلحالي كني الفقير وكن زعلْك السور
كل مابغيت أشحذك هجّت محاصيلك!

بشويش قل لي:شسّوي واجمع المنثور
بس أنت آمر وأنا به بالي كلي لك!

ودي اكونك وأنت تكونني وبالدور:
أنا أحضنك بُن وأنت تضمني هيلك!

ماهو بوقت لتغلي سيدي الممطور:
بالحسن/ وأم المسافة تنتخي بخيلك!

العمر:دفتر وأيام الوصال سطور
يادفتر العمر لاتحرمني سطري لك!

ثلاثة شهوروالوحدة بليّا شعور:
تهد بي حلم وأرجع كلي أبني لك!

لله قل لي: اذا مرّيتني بْغرور:
من وين أجيب لعيوني دمع وأبكيلك؟!