حنّا سعوديين - حبيب العازمي
سلام يا مير المدينة وحييت
تحية الإسلام في كل ديره
يسعد مساك بكل خيرٍ ليا امسيت
ويسعد صباحك كل صبحٍ بخيره
معك المدينه كلّها إن رحت وإن جيت
امنوره وابجيتك مستنيره
يحفظك ربي كل ما اقبلت وأقفيت
وإيوفقك في كل شأنٍ تديره
ويغفر لإبوك اللي رباك وتربيت
على المهمات الجسام الكبيره
ماجد ولد من قص رؤؤس النعاتيت
وسيفه ثلم كل السيوف الشطيره
وانته على إسم الصقر يالصقر سميت
وعبدالعزيز الجد صقر الجزيره
وأنته على السلم رقيت وتعليت
والمجد مجدك وانت رمزه وأميره
والشاهد الأكبر ثقة خادم البيت
ابو الجميع اللي يقود المسيره
صقر العروبه بادي الوجه والصيت
اللي نقل هم العرب في ضميره
واللي جمع شملٍ شتات وتفاويت
وأغنى اليدين اللي منول فقيره
وقّت لحل المشكله خير توقيت
بجوار بيت الله والصلح خيره
وحياه شعبٍ عاش غربه وتشتيت
وبإسمه تهاتفله جموعٍ غفيره
وفالعاصمه بيت العرب صار تثبيت
للرأي والتحرير مافيه غيره
الناس تشهد لك يابومتعب ابليت
بلاً حسن في منجزات كثيره
فتحت باب الخير كله ومديت
جسر العطاء للمدن حتى الصغيره
وولي عهدك عضدك اليا تعزويت
سلطان ابو خالد وزير الذخيره
وجيشٍ جنوده فالمواقف عفاريت
ليا ثارت الهيجاء وشبة سعيره
لو أقبلاهم فالمعارك جباريت
النصر معهم والرحى مستديره
وحنا سعوديين قلت وتباهيت
اليا وقفنا ابليس مادق زيره
قدم العدو نزرع طريقه دناميت
وفوق العدو هبوبنا مستثيره
ولا نخون العهد وانقول ياليت
خاين عهوده ماتسمع شويره
والخاين اللي يخلط السمن والزيت
لو طار منا مايفكه مطيره
المملكه ماهيب احاول وضنيت
المملكة سهله وطبعاً عسيره
حامينها اللي يكزمون الطواغيت
اللي بهيبتهم نصد المغيره
إعيال من قض الركايب على هيت
في ليلةٍ من شرها مستطيره
والحكم ماجاء بإنتخابٍ وتصويت
الحكم له فالاوله والأخيره
يامفتري يامدعي ويش سويت
هلكت وأهلكت الوجيه الشريره
ضليت عن درب الهدايه وأضليت
ولا كسبت الاّ الذنوب الحقيره
وأخطيت ثم اخطيت واخطيت واخطيت
خاين وطنك وتدعي فيك غيره
الابرياء من ذنبهم لو تبريت
ما انته بري والموت جايك وزيره
هذا وانا خادم وشاعر وغنيت
في موطني وأهله عسى الله يجيره
والمعذرة ياسيدي كان زليت
الشرح طايل والدقايق قصيره
وإختامها صلوا جميعاً وصليت
على محمد فالجهر والسريره