حس انك ما تحس..!! - خليل الأحمد الشهري
وأنادي لك!
من آخر حيل في صوتي ..
من آخر ليل في موتي ..
أبي تَسْمع،
أبي تَدْمع،
أبي تطفي شموع الظن!
تَعَبت آشك في أكبر يقين ولا يجيني راي!
تعَبت آدك ما يُبنى وسط بالي من قصورك!!
وعادي لو تَغِيب ولو تَعَوْد ولو تِحِبْ ولو..
لَوَيْت أعناق هالعتمة وَجِيتك ضو..
وكان الفجر يتنحنح على جفني..
وأنا أسأل ليه ما نمتك،
قَبل هالفجر يصْفَعْني؟!
قَبل هالنور يَمْنَعني؟!
أعِيش أعمى وسط ليلك..
تَدَوج الريح وأتساهل مصابي..
تعج الرجل وأتحسس مصيري..
يفز الصبر وأتخثر مواني..
يطول الدم وأتنثر أغاني..
نسيتك لين ما كنِّي نسيتك..
ذكرتك لين ما كنِّي ذكرتك..
عشَقْتك لين ما كنِّي عشقتك..
وقلِّي كيف أبوصفها؟!
وقلِّي كيف أبقطفها؟!
عناقيدٍ تدلت آه..
مواقيدٍ تجلت آااه..
وأنا بِسْلال هالموعد، أنادي هالهوى وأقطف (ولا حاجة)!
رَغم وأقطف (ولاحاجة)،
رجَعت وممتلي بال"لاء"..
رجعت وعاري الأشياء..
يقول أسهب..
يقول أنهب..
يقول اصطاد ما تقدر تصيده..
يقول اعتاد ما تقدر تجيده..
وأنادي الطين في صدري عَتب وإغواء..
وصوت الشمس في عذري تصب أضواء..
كثير أضواء..
كثير أضواء.
وباقي وسط هالعتمة أرتب للسنا..أجواء..
مُحِيط..أشبه...بلذة هالبكا (للناي)،
إذا مَ الريح هبَّت به نغم وفْحِيح!!
ستايرنا هي الأفعى..
هلل..وارميه..
صخب وأنفاس لها ترعى..
صخب تصفيق!!
كفوف الدار طربانة على بكانا..
تجي ونفيق من وعي الكفوف وننهر التصفيق..
تعال وقدِّ..من سمل الجدار شقوق..
وأنا الشاهد على هالجبس..
إذا رأب العيون أدماك..
تعال وحس..بأنك يا عنا مَ تْحس..
تعال وحس بأنك للأسف مَ تْحس !