ياالله - راجح بن مشبب المقاطي
ياالله ياللي لااله الا انت رب العالمين
ياحي ياقيوم يامجرى الفلك فاكوانها
سبحانك اللهم يارب الفلق بك نستعين
يوم ان جزلات المثايل شرّعت بيبانها
في محفلٍ شيّد على سلم الوفا للغانمين
رفيع شان وشيد لرجالٍ رفيعٍ شانها
في حلّة الشغّار كساب الثنا هيف السمين
شيخٍ ليا عدّت مقاديم العرب شيخانها
يزهى بسيرة بدربن محماس مدح المادحين
وتزهى بفعله شيخته بسنانها وعنانها
الشيخه اللي ساسها ساس الشرف دنيا ودين
السيف والمنسف عمدها والشرف عنوانها
وفيحان بن سلطان زيزوم الوفا طلق اليمين
رمزالشكاله والجزاله والوفا ميدانها
شيخٍ وريث امجادٍ ادناها يسامى الفرقدين
وفي كل يوم يزيد بنيانه على سيسانها
يامرحبا باسمه وحيّا الله جميع الحاضرين
واهلاًوسهلاًعد ّماهلّت حقوق غشانها
يامرحبا ترحيبةٍ تبدي كما النور المبين
العود الازرق نشرها والشهد نطق لسانها
اهلاًوسهلاًبالطنايا ماانهمر وبل الغشين
وبني تميم وحرب ماالانوا همل ودّانها
ترحيبٍ آبدّيبه الاقصين قبل الاقربين
واكرّره واثنيه لاهل المنطقه واعيانها
يامرحبا ياشمّر اهل الجود من ماضى السنين
واهل الفعول اللي مخلّدةٍ على برهانها
يدعى ببيرقهم ويخطب ودّهم باثمن ثمين
من الجياد الصافنات اللي طوال ارسانها
وساع الطعون مفرّقة شمل الظنين عن الظنين
كبارالصحون منسّية ضيفانها حيّانها
واهلاً وسهلاً يابني تميم يالحصن الحصين
يااللابه اللي بالمكارم راجحٍ ميزانها
يشهد لهم حديث خيرالخلق سيد المرسلين
اللي بما معناه لاشبّ الفتن شيطانها
بني تميم بفتنة الدجّال اشدّ المسلمين
على عدوّ الله ليا اوقد للفتن نيرانها
ويامرحبا ياحرب واهلاً ياحجا الحيد الزبين
يااللابه اللي تكسب الطاله بفعل أيمانها
كسّابة النوماس حرّاب الدول سعد الحزين
فكّاكة الحرجه لياغطّا النفل دخّانها
أهل الوفا واهل النقا على عصور الاولين
مفاخر الاسلاف حاضرهم بفعله صانها
قلته وانا من لابةٍ تشرىالفخر بالاحمرين
وتامن بها صدقانها وتهابها عدوانها
عتيبه الهيلا ركون المجد والعزّ المكين
حمّاية الماقف هل العادات حرز اضعانها
ذبّاحة الحايل ربيع الجار ريف الممحلين
لطّامة العايل مدابيس السّرب عقبانها
من غير قاصر في القبايل والرجال الطيبين
الطيب وامجاد العرب ماتنحكر حدّانها
وختامها آكرّر تراحيب الوفا بالسامعين
والمعذره وان كان تعبير المشاعرخانها
هذا وصلى الله وسلّم كلّ وقت وكلّ حين
على شفيع الخلق في يومٍ تزوغ اذهانها