الطيب - راجح بن مشبب المقاطي
الطيب فاهل الطيب طيبٍ على طيب
والطيب فالرديان ضيم ومهانه
جمالةٍ فاهل الوفا والمواجيب
مثل الامانه عند راعي الامانه
وجمالةٍ فاهل الرذيله عواقيب
تنزلك من عقب العلا للطمانه
لكنّ خذ منّي خلاصة تجاريب
رجلٍ تعلّم من تجارب زمانه
إقضب من التقوى جويد المقاضيب
تصير لك عن خلف وقتك حصانه
إبذل سبب واتكل على عالم الغيب
وميّز بعرف ووسع بال وذهانه
واحرص على اهل الطيب حرّابة العيب
لو انّهم فالوقت هذا ذنانه
اللي بهم تكبر هقاويك وتصيب
ومعك على قسوة زمنك وليانه
واللاش لو هو من قريب المجاذيب
لايتّفق حذراك شانك وشانه
شم عن مجاله وابد عالى المراقيب
وخلّه يراوح بالردا في مكانه
وان شفت مالك عنه صدّه وتجنيب
بينك وبينه لا تطيح الميانه