شعوب وقبايل - رشيد الدهام

خطوة العين في درب السهر ماتمايل
كن ماتحتها للنوم جرف هيال

جيت ابرقد وخفت ان الليالي تهايل
جيت ابسهروشفت ان الليالي طوال

ها أنا..كل ماصعبت علي الوسايل
قلت:يسهلها على كل حال

ياهو الحظ مايل..أوهو الحظ مايل
ما لهالحال عندي غير هالأحتمال

من تفكر بهالعالم يشوف الهوايل
اصدق من الحقايق واغرب من الخيال

ياصبر متن الأرض اللي له سنين شايل
فوق ثقل الجبال نفوس ناسٍ ثقال

مثل من عاش ماله من حياته حصايل
غيرلاجاك,قال:فلان بفلان قال

قلت:مدري,ولو ادري فلانيب قايل
عادتي فالهروج العوج مالي مجال

اقصر الهرج مالك من ورا الهرج طايل
واترك الخلق للخلاق يابن الحلال

الله اللي جعل خلقه شعوب وقبايل
محد اختار له ربع وعمام وخوال

لو تخيرت تصبح من عيال الحمايل
ماتخير"بلال العبد"يصبح بلال

لو هو بكيف الإنسان اختار البدايل
كلٍ اختار له جاه ومال وجمال

والبشر في النهاية..فرد ماهم سلايل
في قصير الشجر وش ذنب طول الظلال

والعمر في النهاية..وقت والوقت زايل
الغني من يحطب الطيب له راس مال

والشعر في النهاية..قول ماهو فعايل
كل مانقصك ماوصلك للكمال

لهجة القلب ولسان الضلوع النحايل
بس مايرفع الرجال فوق الرجال

كان حتى القصايد معتبرها جمايل
اختصرها ترى ماعاد تسوى ريال