شفت الرسالة - رشيد الكثيري
شفت الرسالة من قبل فكة الريق
وروقت يومني قريت الرسالة
رسالةٍ تروي كبود المشافيق
وتسر حال اللي برى الجور حاله
غنيةٍ عن كل رايٍ وتعليق
مقالةٍ يا حلوها من مقالة
فيها الجبال النايفات الشواهيق
عشر وثمانٍ عدها بالكمالة
أحصى عددها خاطرٍ يمها سيق
سوق الجميل لطيّبين السلالة
مصيونةٍ من كل كسرٍ وتلفيق
موزونةٍ ما شفت فيها مياله
جتني وانا في حزة الهم والضيق
كلٍ يقول رشيد واعزتاله
وبديت اغني واطرق الهم تطريق
مبسوط يا ربي لك الحمد وداله
كني غديت بوسط قلطة وتصفيق
مغير أغني يا للالا يلاله
يا شاعرٍ قفى بيوته على إيق
ثبت قوافيها على ما بداله
وجاب اللحون بوافيات الطواريق
تعجبك كل ابياتها بالجزاله
اللي تعد الطيب بين المخاليق
يا حيّ ذكر الطيب ويا حيّ فاله
ذكر المراجل روق البال ترويق
واستبشرت عيني بشوفة هلاله
وبقيت في لحظات شوقٍ وتشويق
أخوض في بحرٍ وسيعٍ مجاله
عزيلكم ياهل القلوب المطافيق
ياللي تقضيتوا من اردى بقاله
اللي بضايعها بوسط الصناديق
مغشوشةٍ فيها ختوم الوكالة
رخيصةٍ تحتاج غشٍ وتسويق
تمشي على اللي نيته قد حاله
عليك بالغالي رفيق المطاليق
اللي حرامه ميزه من حلاله
لا قال شيٍ صار فعلٍ وتطبيق
والرجل ياضحلك بحزة فعاله
ما هوب مثل اللي هروجه خثاريق
كثير هرجٍ ما عليه اتكاله
وقت الرخا يعطيك عهد ومواثيق
وفي حزة الشدة يغيّر مقاله
وان صاروا الخلان كل المخاليق
في حزة الشدة تقل الزماله
والرجل ما يحتاج فحصٍ وتدقيق
إعرف جليسه قبل عمّه وخاله
وبعض البشر تحتاج كذبٍ وتصديق
وترى الحذر مطلوب في كل حاله
أحدٍ برفقانه سعى بالتفاريق
واحدٍ يدور بالبعيد الجماله
واللي يبي فرقا القلوب العشاشيق
يا ناس فال الله ولا فال فاله
يا رب تجمعني بربعٍ صواديق
وانك تجنبني عن اهل الرذاله
وختامها صلوا على ازهى المخاليق
اللي بعثه الله بنشر الرسالة