اللي لها المجد ينساق - رشيد الكثيري
قومٍ تعلّت شمسهم بعد الإشراق
وهم للعرب بين الكواكب دليله
حنا كثيرٍ بالمكارم والاخلاق
حنا حماة الدار وجار القبيلة
سيوفنا مرويّةٍ كل معلاق
عدونا بالحرب طيّر شليله
معروفكم ياارشيد من حول الاعناق
وسبيلكم محدٍ يدوّر بديله
في دربكم لو تتعب الرجل والساق
نمشي كثيره قبل نمشي قليله
وقد ردّ " رشيد الكثيري " عليه بأبيات قال فيها :
قال الذي لمراسَل الشعر يشتاق
مشتاق لابيات الفخر بالقبيلة
أهلاً ومرحب عد ما ناض برّاق
باللي يقول البيت واللي يشيله
صارت بيوتك في صميمات الأعماق
تبرق وترعدبي سوات المخيلة
تاريخنا يالقرم في كل الأوراق
لا شك ما توفيه قصة طويلة
أقولها من دون اكاذيب ونفاق
وافضلٍ كلام اللي يدلّك قليله
كم من كتابٍ وثّقه كل وثّاق
"عنوان مجد" اللي علومه جميله
وتاريخ "ابن بسام تحفات مشتاق"
"والفاخري" هو "وابن عبّاد" وجيله
حوادثٍ واخبار من صلح وخناق
مع الزمن مابين عدله وميله
تاريخنا في نجد للمجد ميثاق
بالعارض اللي كل ذكرٍ يجيله
تاريخنا بحجاز وبنجد وعراق
حتى بعربستان يندر مثيله
سبحانه اللي خالقٍ جمع وفراق
يجمع ويخلف بين يومٍ وليله
وانسابنا ياخوك تشرى بالأعناق
"عسّاف" "ونبهانٍ" جموع القبيلة
لابة "كثير" اللي لها المجد ينساق
مادام "زيد الخيل" "وحاتم" سليله
من "لام" من "طيٍّ" على الجود سِبّاق
أهل الوفا والجود عز الدخيله
وانا لي اسمٍ رافعه فوق خفّاق
لاصار غيري آخر اسمه يشيله