عناد وفراسة - رشيد بن زيد الزلامي
قالوا تعلمت قلت عناد وفراسة
أعاند النفس والدنيا وأصارعها
ودرست في مدرسة من شيبت راسه
دنيا العنا اللي قصيفات مطامعها
تلميذها دايم تكتب بقرطاسه
وتعطيه جملة دروس ما يضيعها
والله عطانا نظر وشعور حساسة
ناخذ علوم المعرفة من مراجعها
ونساير الوقت ونقيسه بمقياسه
ونمشي مع النفس بالواقع ونقنعها
وترى حياة الفتى مهما قوى باسه
محفوفة بالخطر والموت تابعها
من مبتدى العمر لاما يلفظ أنفاسه
يمر في مرحلة تكثر زوابعها
أول حياة الفتى تدريب ودراسة
تكثر ظروف الحياة وينشغل معها
وثاني حياة الفتى مشوار وعساسة
مسيرة في عجاج الوقت يقطعها
وآخر حياة الفتى يرجع على ساسه
النقطة اللي بدا منها يراجعها
يرجع لسن الهرم ويضيع الطاسة
ويمشي مع الأرض ويخطط شوارعها
واليا تلاقت متونه وارتخى راسة
ضاعت جميع العلوم اللي يجمعها