نجد في أول يناير - ريمية
قال إنتي تجننين
قلت ما ظنّي أجنن
ماهو لأني ما اجنن
بس لأنه أساساً
ما بقى بالدنيا هذي عاقلين
طق طاق
راحت الدنيا باهلها
العقول مهاجره
والبشر في كان كان
والعرب متروّحين
**
أما عني
ما أجنن غيرك انت
وكافي انت ...
يا الله خذني
إمسك ايدي
حتى لو ينقد علينا العابرين
ذولا هم أهل الرياض
من ظبي يتذيرون
وعلى كل شي ناقدين
رغم ان اهل الرياض
أكثر اللي في قضايا الحب
تحصدهم قصيده
ولا احلى عندهم من حكاوي الشعر
واخبار الغرام
إما طرّادة هوى والا طرّادة قصيد
بالطبيعه عاشقين...
**
يا الله خذني
ودني لاغلى المقاهي بالرياض
حلوه فـ البرد الرياض
واهلها فـ اول يناير
رايقين وممطرين
خلنا نتمشى يوم
مثل أي اثنين تجمعهم قصيده
وبيت من شمع وحنين
يحملون اطفالهم فـ قلوبهم
ووين ماراحو ...خذو...باقة وصايا
طفله تطلبهم دونات
طفله تبغى شوكولاته
وطفله تحلم بالسفر
تبحر لساحل جميل
مثل كل المبحرين
**
إمسك إيدي
حنا في آول يناير
يفترض فـ اول يناير
يسقط المنقود عنا
برد هالدنيا يا شاعر
برد برا وبرد جوّا
برد لو نلبس بعضنا ما نلام
للضروره أحكامها
مثل ما عند الذرايع
سد في وجه أي شي ...
والضروره وش بلاها
يعني ما فيها فرج
للعرب والمسلمين؟
**
برد يسرد
ما هي قصة شاعريه
باردين ملجلجين
ثلجّت روحي وصوتي والنجوم
ما على دمي هدوم
عضني ذيب الصقيع
نابه الأزرق بعظمي له سموم
الشمالي في يناير صرصرين
والهبوب الشين شين
لا يدفيه الحنان
ولا يواليه الحنين
حتى حضن أمك وابوك
حتى سيارة غضا
حتى َسمْر الحرتين...
**
إمسك ايدي
والا لاتمسكها كانك مستحي
واهمس بخوف وحذر :
يا مَرَه لا تمسكين ...
هنا حنا فـ الرياض...
ما أحد يمسك أحد
عيب في نجد الرجال
تمسك إيدين الحريم
قلت لك لا تمسكين...
ولا حتى يصدقّون
إن هذي زوجتي
تبلشيني وتبلشين
إبعدي عني شوي
إثقلي لا تسبقيني
إعقلي لا تمسكيني
واستحي لا تضحكين
حنا في نجد العذيه
واهل نجد مذرّبين
**
بعد عمري
شرهتك على من تنجّد
قضى عمره إما مطيور ٍ شمالي
والا بحري ما درى
عن هوى المتكفكفين
أما عن نجد العذيه
هقوتي وان زاد هجسي
كن عيني شايفه نجد العذيه
في بحر عشرين عام
طرقا والقذله تلوح...
وراثعه بالعالمين
**
إمسك إيدي
قبل ساعه قبل نطلع
قلت لي إنتي تجننين
يا حبيبي الشهم يا اللي ...
لمّا تبغى تصير حتى أنت تجنن
واجمل العشاق واكثرهم لطافه
يا شفيف اشف من روح القصيده
واحلى من شهد الغزل
وابيض من الياسمين
هنا في نجد العذيه