ماللحزن - سامي الشرابي
مرحوم ياللي خدمت البيت بإحسانك
مرحوم ياللي غديت برحمة الوالي
عسى البقى في اهلك وباقي اخوانك
يالغالي اللي جدير بقولة الغالي
يافهد وش هو الحزن .. ماغير فقدانك
صرخة وفاتك تصدّع شامخ اجبالي
يافهد وش هو البحر .. مع دمع مرجانك
لاصار دمع البحر .. في خد موالي
احزن على موتتك .. وابكي على شانك
لاشفت صورتك مطبوعه على ريالي
يا كتاب نهض البلد والعز عنوانك
ملكت قلب الشعوب .. بطيب الافعالي
مليت بطن الفقير .. بجود بستانك
وسقيت قلب اليتيم .. بوصلك الحالي
ضحكت لجل الصغير ..فغمرة أحزانك
وحزنت لجل الضعيف .. وقلت لا تبالي
طرقات يد اليتامى .. نبض بيبانك
شمسك على روس شعبك صارت اظلالي
بنيت دار الغلا وجودت بنيانك
واصبحت جار السحاب الشاهق العالي
شربت درب المراجل شرب فنجانك
وقطعت دابر حثاله مالهم والي
يافهدنا ما رضينا نغمض اجفانك
ولا اللي رضينا عليك الترب ينهالي
اقول وعيني تناظر دفن جثمانك
ما للحزن في رحيلك يافهد تالي
يافهد هذه عربك وهذه اوطانك
تدعي لك بكل وقت الخالق العالي
ينبت زهور النفل في لفة اكفانك
ويصب نوء المطر عليك همّالي
يبقى بلدنا عزيز بعزة اخوانك
ياللي رحلت وغديت برحمة الوالي
ما أنساك ياللي ربيت ابفيّة أغصانك
لو أني انسى ملامح أمي وعيالي