جزري ومدّي - سعود الصاعدي
يا بحر انا اللي بين جزري ومدّي
والا انت بين الجزر والمدّ معتاد
اعلنت مع نفسي عليّ التحدّي
امّا انتصر والاّ عسى العمر مازاد
الوقت ما هو وقت مصباح جدّي
يوم المواقف تجمع الناس الاجواد
يوم الوفا من فوق حدّك وحدّي
قبل يتعثّر بين دلّةْ وبرّاد
يا بحر انا ملّيت قوم التردّي
اللي لهم فوق الردى خرج وشداد
ناسٍ تخلط مزوح ضحكي وجدّي
والجدّ له عندي مواثيق واسناد
ما هو سوالف في طريق المعدّي
والاّ حكاية بندقيّة وصيّاد
نفس الطريق اللي يجيبه يودّي
ما دام ما به صاحبٍ يحفظ الزاد
قرّرت انا امشي في طريقي بحدّي
ما كلّ سيفٍ يصقله كلّ حدّاد
كم قلت لحبال المواثيق:شدّي
وش هي بدون النّاس ضحكات الاعياد ؟!
وانا ادري انّي للجماعة مردّي
لو انّ فخري قبل فخري بالاجداد
من طيب نفسي قبل لا امدّ يدّي
قلبي يمدّ لقاطع الحبل ميعاد
واحيان ودّي يطلع الحقّ ضدّي
عشان اعلّم صاحبي كيف ينقاد
واحيان ما ودّي ولو كان ودّي
أخاف من حاسد وشامت ونقّاد!
دنياي فيها من يحبّ التعدّي
والناس : واحد فالف مبغض وحسّاد
وان كان ما لقي الزمن ناس قدّي
باعيش واحسب لحظة الموت ميلاد