هيكل - سعود الصاعدي
قبل مصباح الأمل يطفي حنينه
وقبل ينزفني زماني بيت بيت
شبّ ضوّ الشعر واحسب لي سنينه
شوف كم باقي منه والاّ انتهيت
خطوتي غابت عن عيون المدينة
وانت توّك يا محمّد ما ابتديت
وضحكتي صارت ملامحها حزينةْ
كلّ ما جاني فرح ضقت وبكيت
يا بن عمّي لا تحسب الشعر زينة
زينتك لا زان طبعك واهتديت
قيمة الرجّال في تهذيب دينه
لو قريت اللي قريت وما قريت
وش يفيد الشعر واحساسك رهينةْ
لاامتليت تفيض وان فضت امتليت
قصّة الشاعر تقول :الله يعينه
خذ كلامي عنه يللي ما دريت !
في شماله ما يحصّل من يمينه
وراس ماله:ميل راس وشطر بيت
وملحقاته خاتم وساعةْ ثمينة
مع تذاكر للرياض وللكويت !
يحرث الدنيا ويتعب لجل تينةْ
وان تمايل غصنها قال : اكتفيت
يا محمّد إنشد اللي خابرينه
لو شربت الشعر كلّه ما ارتويت !