اكتفاء ذاتي - سعود الصاعدي
تحاسبني على كيفك وانا مالي عليك حساب
وتشرح لي زمن قبلك مشيته واعرف شروحه
وتطعنّي بموقفك القديم الميّت المرتاب
وتنسى ما بنيته في هضاب الوقت وسفوحه
تصكّ الباب والا يا رفيقي ما تصكّ الباب
ترى كلّ الطرق صارت بعد فرقاك مفتوحه
وتضيق الارض والا تتّسع والا تصير شعاب
أنا شاعر ولي قدرة آحبس الناس في لوحه
ليا راح الفرح عنّي وعضّتني عليه انياب
أسوّي لي من احلامي فرح وآشيّد صروحه
ولا غاب البدر وامست عيون الساهرين اغراب
أردّ البدر بكفوفي ، وارجّع للسهر ضوحه
ولا شفت البحر صامت وفي صمته سمعت عتاب
اصبّ الشمس في كاسه واذوّب روحي بروحه
فقير الواقع آردّه غنيّ بفنّي الجذَّاب
سوى الفنَّان كلّ انسان فيه احلام مذبوحه
يموت الشعر لا نادى بصوت احساسه الكذَّاب
ويحيا لا نزف دمعه بقايا نفس مجروحه
مادامي بالشعر قادر أفتّح فالصدور ابواب
أبالقى لي صدور تضيق والقى صدور مشروحه
ويكفيني من الدنيا ولو ما القى كثير اصحاب
صديقٍ يوجعه جرحي وانا توجعني جروحه