ياهيه - سعود بن بادي المرشدي
ياهيه ماني مثل غيري من الناس
الله خلق بي عنك فرق ورفعني
الفرق فالغاية وفي همة الراس
وفي شايبً يم المكارم دفعني
اي والله احضر لاحضر كل نوماس
ولااتبع الخايب ولاقد تبعني
من دون طيبي ماتملكني الياس
كلمة نعم بين المناعير تعني
قابلت بالدنيا اواليد وانجاس
وعرضت خدي للزمان وصفعني
صفعة شرف مازعزعت قوة الباس
الصبر منها ماشبعته شبعني
كسبت درس مايدون بقرطاس
درسً مكن بين الضلوع ولسعني
مكنت , مايمكن قبل حد الافلاس
حبل الجهل لو ماقطعته قطعني
ياهيه عقلك بالمجالس لك قياس
وانا معك بالعقل مالله جمعني
تحرص على النمه وللسم دساس
كم كلمةً قالت لشرواك ( دعني)
لاصرت معدوم الثقه ميت احساس
مالله على خلقه وكيلاً وضعني
وان كان صدرك ماوسعني فلا باس
الباس لو صدرك بضيقه وسعني