وين ربعونا - سعود بن بندر
قلت وين ربعونا قالت سلوا
وكشرت في وجهي رمال عطاش
شالوا الفرحه معاهم وارحلوا
لا علوم .. ولا سلوم .. ولا بقاش
مع جديد العصر والعيش الحلو
كل بدنياه في طيش ومعاش
قلت هونك يالثرى مهما فعلوا
عنك ما يعلون وانت اريح فراش
حضنك الباقي لهم مهما علوا
بس انا من دونهم .. مالي .. ولاش
عنك راحوا بس بالقلب انزلوا
مثل ما ينزل على الورد الفراش
من رحيق الحب شربوا ونهلوا
كل ما في خافقي .. واصبح نشاش