يا شين صبحي يوم آخايل إعصيره - سلطان الأسيمر
( يبه ) كبر ( شبلك ) غدى اليوم رجال
( يبه ) وجرحه داخل الصدر ديره
( يبه ) وانا اللي ما شكى يمك الحال
عجزت اشيل هموم صدري كبيره
(يبه ) جذبني للعنا صوت الآمال
كن العنا يهدر عليّه هديره
تذكر وانا اللي يوم لبسّته عقال
وسلمت ( ورعك ) والمراجل مصيره
اشياء ماتخطر على خاطر وبال
كنت آترزز قدم ذيك الصغيره
كنت احسب اني عاشق ٍ جد بهبال
واقول في نفسي انشهد ( دميره )
( ورعه ) يطيرها غزل كل دجال
و ( ورع ٍ ) حفظ قدره علشان غيره
ما كنت اعرف آقول ياعيال ياعيال
مغير اقول الله ياهي خطيره
مغير اهيجن صاحبي لابس الشال
يسوى العرب واللي سكن بالجزيره
لعيونها حطيت هالصدر تمثال
ورسمت قلبي وكر والاسم طيره
ولعيونها يوم ( إسقطت ) صحت بخبال
ومن شانها كسرت بيت المديره
ويوم إنجحت لبسّتها عقد سلسال
وكتبت حرفي مع حروف ٍ كثيره
ياكثر ماني كنت عاشق ومحتال
حتى ( اليماني ) ما سلم مع ( خشيره )
كنت الشقي كنت الذكي كنت لا مال
حظي اقول الحظ مردود خيره
واليوم اشوف همومي جبال ٍ إطوال
لا طاح هم ٍ عدل الوقت سيره
يابوي ارفعني ترى الرخص قتّال
يا شين صبحي يوم آخايل إعصيره
يابوي يا مشكاي يامعدل احوال
من غيرك اللي لا انحنيت استشيره
ما جيتك اشكي من عنا بعد واهوال
الا اشتكي من شح دنيا ً غريره
من عقب ما الدنيا تحتنا وتختال
اليوم عيا السيف يدهل جفيره
والرجل لو حمله على غاربه طال
تبقى القصيره بالحياه القصيره
مدام صوتك باقي ٍ لي مع الجال
ما بي من الدنيا ولا الناس جيره
و( يبه ) ترى ( ورعك ) غدى الحين رجال
لو ان همه داخل الصدر ديره