فهد - شايع العيافي
قالوا فهد قلت ياهل البيت نادوا به
مالي وللناس حاضرها وغايبها
فهود ياغاية فؤادي ومطلوبه
يانور دنياي ياغالي جلايبها
لبيه يالذة للعين محبوبه
والعين ماتستلذ الا حبايبها
ياصغير البيت معك القلب لعبوبه
ما يبغي الا سوالفك وعجايبها
نوبه تغاغي وتضحك عقبها نوبه
ونوبه يجي بكية ماعرف سبايبها
ياعين حر ضحى المقناص هدوابه
برق الدواغر ملقيها عقايبها
أشوف فيك السعد راسه وعرقوبه
يسعى مع النود ويباري هبايبها
متلبس العز الأول ضافي ثوبه
جدك دروب الوفا محفي ركايبها
والماكر اللي مطله راس مشذوبه
في شفه العين شامت عن قرايبها