يا هالليل - شايع العيافي

لحووول يا هالليل ما اصعب ظروفك
علي ساعاتك خطوب ورزايا

شبعت من شرك وعفت معروفك
لاني طليبٍ لك ولا لك عطايا

حطيتني مابين مقرن كتوفك
وسرجت همك مبهمات الحنايا

قبل الصباح ..يمرني من حتوفك
غبن الكرام .. ومعركٍ للسبايا

كن الجروح الساطيه ..من وصوفك
لك في دموع العين شف وبغايا

وآقلبي اللي ماحصل من يروفك
وطت بك الضيقه فجوج ونحايا

ارهيت والدنيا غثاها يحوفك
غدر الحبايب ..واختلاف النوايا

ميعاد طلقين النواظر يطوفك
وديار مدمين المحاجر خلايا

اقبلت والعيين قالوا ذلوفك
وليت ياقلبٍ نسيت الوصايا

شرهتك للي بالجفيا يلوفك
لامرته عقب الزراج المطايا

قل يا معزبنا ترانا ضيوفك
واكرامنا تسمع هروجٍ ملايا..!

ياخاين العشره الى امنت خوفك
دور لوافين المشاعر نعايا

حطيت راسي في مصاحف كفوفك
وسميتك المملوح عذب السجايا

حتى تعلمت الغزل في حروفك
ولبست ثوبك .. والقصايد عرايا

شافوك فعيوني .. وعيت تشوفك
من هزعة الخاطر ..كفوف التحايا

ارخصتني وابعدت عني قطوفك
واوميت بي للموت ..بتلا التلايا

حرام ما تبرا عليه حسوفك
لابادت عزومك وطاحت ونايا

الله يبلغني توالي حتوفك
غدرك ضياع ..وغدر عمري منايا