صلاة الجنازه - شايع العيافي
لوحي على حاجب البغض الخفي واطلعي
ياصبغة الحقد من فيض الضمير ونباه
تطاولي قامتي ساعة زمن واهجعي
والله ما يفتح فقير النفس باب الغناه
يانيتي خلصيني وان حدوك اشفعي
للبعد وادني بعيره وانقلي له عصاه
ياما تحلويت بعض الهرج في مسمعي
وياما لحقني من جروح الزمن والحياه
رفيقي اللي يباريني ويضحك معي
أصد عنه ويرمي فوق راسي حصاه
معذور لو ياقع الوجدان فاقد وعي
لكن معي تجربه وأبوي تارك وصاه
ما كل غدر يوردني على مصرعي
ترخص قضاة المحاكم والغلا للجناه
لاجات بيني وبين الروح كيف أدعي
وارواحنا بالخطا تمشي حفاة عراه
بس البلا قولت آسف والغلط مطبعي
عين تكحل عمى والقلب يصعب دواه
همنا ودمنا....وحكمه قالها الأصمعي
ما يونس الجمر الأحمر غير منهو وطاه
ياصاحبي لاتطوف اليوم خله سعي
واعطيك حمل تضعضع به جبال السراه
الطيب تالي لياله خدره موضعي
ميت سريري وعيت لاتجيه الوفاه
صفحه على النت والموضوع كله نعي
وألحق صلاة الجنازه لاتفوت الصلاه