يالله - شايع العيافي
الا يامن لك السبع سجدت فوق الثرى بالهون
يا نبراس القلوب اللي من الأيمان معموره
ياعالم خافيات الغيب يوم الناس مايدرون
بليل يغضي اهدابه وصبحٍ ينبلج نوره
يامن ناداك من تحت الظلام ووحشته ذا النون
لك قلوب الأنابه تقبل من الذنب مذعوره
وعن موسى عصاه وكفه وعن توزيرته هارون
وسلطانه على الأفك العظيم ونقض مسحوره
يامهلك قوم عاد وقوم لوط ومهلك قارون
تذاعن لك عناتيت الزمان الصلف مجبوره
ياقاضي حاجة المحتاج..موفي دينة المديون
نفذ صبر العباد اللي من الاوضاع مقهوره
نطحني ليلة البارح .. يصالي جمرة الغليون
ضعيفٍ عزة البسمه عليه .. وضاقت شبوره
فتق صدره حنين .. وجر صوت الصابر المغبون
تواسيه الدموع .. ونبض قلبه يجرح شعوره
مواريه الجروح وهمهمت صوته عن المكنون
نطيش دلال رسلانٍ بضو السمر منحوره
ياصاحبنا لك الله .. والله امره بين كاف ونون
تضيق وتنفرج والله يقدرها بمقدوره
اقول تهون.. لو زمزم غثاها فالضمير... تهون
عساها من ذنوبك وانها بالعفو مغفوره
اخذ من سورة الأحزاب ولا التين والزيتون
مايشفي صدرك الدامي.. من اللي طارف شوره
كثير الناس لو منتب تصك الباب بالكيلون
لقيت اسرار بيتك عندهم بالصوت والصوره
يجيك بكلمة مقدارها بسمه وضحك سنون
ولا عنده من الأحسان غير يمد حنجوره
يبيله غرة وحده يبرمجها وهو ممنون
ويبنيها سواة الضلع لين تعدي سبوره
يسوقها نهار الصبح للصاحي وللمجنون
وتآلاك الشدوق اللي على طيحتك ممروره
قبل لا تصبح الدعوى على هامان يافرعون
تشوّف للقمر واليا بدا... خلك على نوره
ويلا قفت لياله والتوا واصبح كما العرجون
تجمل بالصبر في وقتك ليا مد ميسوره
على صوتك طحاطيح الهوى في غيهم يسرون
تحت سامر نجومٍ في سواد الليل منثوره
احد يمسي ورى صنعا واحد يمسي بمرج عيون
واحد يصفق كفوفه بالحسايف لانتهى دوره
عطاك الله مقاليد الغلا.. ولك الولاء مرهون
وانا من ضيع الدنيا وعاد العمر بزهوره
لا تنشد كيف حالي يوم تلقاني ولا وشلون
تنطحني بصدر دونه الأزرار مزروره
يجوز اني عليك اشكي واقول الناس مايغنون
والى ربي عطاني منك كل الناس معذوره
ابيك تقول للعذال .. ياعذال وش تبغون
قلوب اهل الهوى بالود.. منهيه وماموره