مطروق اللثامي - شايع العيافي
وين اودي غربتي والليل مطروق اللثامي
وين اولي والحنايا قوم والفزعه قليله
كل مانوخ زهيد النوم في عيني ونامي
دست باطراف الغلا جمره وسرتني مليله
آه يابرد الهيام اللي تساقا في عظامي
اكتسيته من عراي ولاعلى ناره دليله
يكسر الحومه على ذكر الكبير من الأسامي
ويتعلق بين رمش العين واطراف الجديله
انت يانغمة نزيع الشوق ياعذب الكلامي
حرفك احساس الروى والروح تشرب سلسبيله
وان حجبك البعد عني وابتدا هاجس غرامي
قلت انا في وجه ليلك قبل لايوخذ دخيله
معك يسريبي نهم قلبي على ريش النعامي
واسبح بليل الذهول وتاخذ المده جزيله
ماورى عينك لعيني غير شوفك والصيامي
جعل مايعقل بعد شوفك على عيني عقيله
نوخي بين الحقيقه واستثارات الحلامي
طرقة العاشق متاهه واستخاراته فشيله
والرسوم اللي خذاها الزود وطعون الظلامي
والله انها عن زمان الغدر في راس الطويله
دونها ستر الوجيه من القفيا والملامي
شعرة في عرض خدي.... والف ليله والف ليله
يابياض الطرس يارش المطر عقب العسامي
يامهابة باقي انقاض النساء فوق الرذيله
ياعزيز الذكر ياطمعة جلالي واحتشامي
فيك من هيبة كبير الجاه واصحاب الفضيله
معك قيد الهرج لرقاب الحكي مثل الخطامي
لاوي راسه على متنه ويعسر في ذبيله
وان حسبت هموم صبري في حلالك والحرامي
مرت الدنيا على بالشح والنفس البخيله
جرهدي الشوق منهل كل صب منك ظامي
والله اني وارده ورد الظمايا للثميله
جاحد علق بخلان الأشده والمسامي
والعرب في نجد تدري بالخفيفه والثقيله
بانت الخله وطحنا بلغوا عني سلامي
غربي الخفجي جنوب من الشقايا والرميله
غربة سجانها ليلي ومطروق اللثامي
وين اولي والحنايا قوم والفزعه قليله