يا اخوي - شايع العيافي
ياخوي لابانت عليك التخاليف
ياخوي وأنت الذرب زين الطبيعه
ياخوي وانت العرف راع المعاريف
ياخوي يانسل السيوف الوريعه
ياخوي ياباب الصخا منوة الضيف
يالشامخ اللي يمن الخوف ريعه
ياخوي لاخانت ليال الشفاشيف
انت الذرى وانت الحصون المنيعه
ياخوي زلزلت الضلوع المهاديف
وانا مانيب ارضى عليك الهزيعه
ظني بك اكبر من خشوم المشاريف
لاضاع ظن مضيعين الوديعه
يامحزمي وانته نطيح التكاليف
تراك ضيقت الفجوج الوسيعه
بيني وبينك ما تصير التناتيف
ولاينفتح باب الجفا والقطيعه
الله يلعن هاجس الكذب والزيف
بغى الوقيعه ماحصل له وقيعه
ياخوي يامروي كبود الملاهيف
محجة بيضاء وشرع وشريعه
وان جا لمطلاع التويبع عواصيف
الشك مايلحق زبون الطليعه
اخوي يوم ان الهواجس تخاريف
تفداه كل اهل النفوس الدنيعه