عراب الاوضاع - شايع العيافي
الله من شي لجى بين الأضلاع
ضاقت به حدود الضلوع النحيله
اركى على قلب من اقصاه ينزاع
زوع القطا من حس وارد ثميله
من عقب ماهو فاخضر الغصن شراع
خلى مخامير الغصون الظليله
الا ان قلبي جافي الصبر جزاع
والليل غربه والمواطي ثقيله
ان صحت جاوبني من البيد متلاع
وارجف صدى صوتي براس الطويله
عواقب الطرقه معا قاصر الباع
اللي سبيلي حطني في سبيله
ياصاحبي بكتب على وجه الأبداع
بالمنطق اللي زبدته من ذبيله
خلاصه وفوقي مع سوء الأوضاع
والطالع اللي ماملكني جميله
مافيه ليل يمرني دون ما ارتاع
روع القلوب الغافلات الذليله
غدر وكذب ونفاق واسفاف وخداع
ومعامل اصحاب الكبود الغليله
عوارف آخر وقت شينين الأطباع
اللي ملابسهم ثياب الرذيله
اطيبهم اللي في قفا الناس قطاع
هذا خذا علمه وذاك يحكيله
معتاد فالغرات شراي بياع
يحث رجله ويتشاوى حصيله
وانا قنعت وصرت للوقت مطواع
الوقت هذا صعب مافيه حيله
لاشك باخذ صاع وارد بالصاع
واحلل الدم الوبي بالفصيله
وان راحت ضنوني مع الحزم خراع
ياما كسب زندي وياماغديله
انا على ماقال عراب الاوضاع
طرقي وراس المال جغمة صميله