سهيل - شايع العيافي
جذبك الليل ولا بارق المزنه بنصف الليل
بعد غنى رعدها فالحنايا من طواريقه
لحن غر السحاب اللي مباديها بشير السيل
على قاع من صدوف الدهر "عاده على ريقه"
ياقلبي وش بقالك من جدا ولا بقى من حيل
ترا هذا الزمن مايشتكيه الا مطاليقه
لو ان القصد غارتنا ليا امتست ظهور الخيل
عطينا صافنات الخيل.. تغريبه وتشريقه
وساعه عدلها وافي وساعه ماتعدل الميل
على حظ مفاتيح الوفق تكسر مغاليقه
لكن القوم غير القوم..والبارح ماهوب قبيل
مضالي وقت ياقلبي على الهوجاس والضيقه
طلع نجم النجوم اللي تسميه العباد سهيل
ونسنس ليله البارد على الجوف ومعاليقه
معه ريح الخزام ونفحة الجاوي وطعم الهيل
وبسمات الربيع اللي كسى وجهه زماليقه
له بروض الحشاء كنه.. وصداته عذاب وويل
عسفني له قوي الحيل من بدة مخاليقه
ليامنه حضر جاء في كبار القوم حط وشيل
ويلامن غاب صبري من رداة الحظ ماطيقه
عسى ليلٍ ضوانيبه..يعاودني بعد كم ليل
ليامن صمت وافطربي هوى الأحباب.. من ريقه