زفره - شايع العيافي
هيام الطرقة العوجا وميرادي لحوض الموت
ولارفقة ردي الرابعه والنذل والعاقه
رفيق لابدا لازمه يلقاني على أول صوت
ويلا لبس الغناه أنكر زمان العوز والفاقه
أنوخ له ذلول البين والمنحي بها مبخوت
ولا مسح الوبر والباركه ماهيب لحاقه
يقولون العرب هرج النواظر والرجال سكوت
بلاغ مايغره غير قلب الشاه والناقه
رديفي واحد تلقا عليه من السلوم سموت
خشيري في مناويخ الليال وقلة الطاقه
يباريني على العليا ومداته عمار بيوت
ولو هي كلمة ينطق بها والنفس مشتاقه
على ظني ورمعاتي توثق به بدون ثبوت
معودني وانا معتاد مايختل ميثاقه
الايا جرحي الدامي ولايا سدي المنكوت
عليك القلب عذروبه ضياق الصدر وأغلاقه
شحيحات الليالي ليتها شحت بنصف القوت
ولاشحت بربعي وأقبلت بالنذل والعاقه