يا مشعل - شايع العيافي
كرهت النايفه..من فعلها بالخافق المنظام
طويلة حيد..ترقبها سباع الضلع ونموره
غدت للعين هم..وجات للشفوف المنام خزام
عسى عيني من اللي مسها بالضر.. ماجوره
ويلا صاحت جروح اليوم واستجفت جروح العام
تبي طي الضلوع وكسرةٍ ماهيب مجبوره
غدت سبع العجايب بين سور الصين .. والأهرام
وصغرت في صبي العين..روس وجات مكبوره
وبادت عقب ماسادت..بيوتٍ عزها مادام
تزلزل عزها ..وامست مع الأطلال مثبوره
يا مشعل يا حزامي يوم كلٍ له سند وحزام
يا عمّار الهقاوي ..يا حصاد المجد وبذوره
تواسى جنب من هز العروش.*. وحطم الأرقام
وسمرني على جال الهيام وهز باكوره
مودٍ .. ويش اقول ليا ذكرته ؟؟ والله العلام
ماقبله واحد..طلّع ثقيل الروز من طوره
خذاني مثل ماتوخذ مكاسيب اليمن للشام
ألين ان الجمل برك على حيد الصفا زوره
ليال الظلم ..بتاعه.. تهز الباس للظلام
الى شافت قليل الحظ ..!!جات السود مسعوره
اجلّلها بستر المحرم وتسري جسد واحرام
على الغادر عباة الغدر مذروعه ومشبوره
يعلمني زماني ،، واتعض من عادة الأيام
ليا ضاقت دروبي والسعه للناس معموره
سبيل الغادي التايه .. ومركاضٍ ورى الأحلام
وعشاق الضياع ضعوف... منهيه وماموره
على بيد الهوى تقفي وتقبل والكبود حيام
وكم تحت الصدور قلوب ملحوده ومقبوره
وانا ليل الهوى باليتم يمسيبي مع الأيتام
يعرضني شقا الدنيا وليلٍ مسني جوره
عجزت من الكلام اللي يثيب..!! وصرت الأقلام
ولا وخرت عذرٍ للشموت امد مقدوره
ماغير اسوق عمري من مكاني وانهم الأقدام
اسوي لي على عوج الروابع لفه ودوره
زبون الهم لا خانه فساح الصدر مايلام
تعديه الجروح بهاجسٍ... للصوت والصوره
سوالف ساحر الكلمه .. بلا غنه ولا ادغام
ومطلع غرةٍ ياقف لها " الرايخ " بطابوره
يساحب لي على المسحوب.. وانهم له على النهام
واسهر له عيونٍ عن لذيذ النوم مصخوره
وانا ادري مايجي فالربق غير بهيمة الانعام
لكن الراي رايه "ياهوى" والشور من شوره
عسى ربي يعديني حبايل عابد الأصنام
بحق البيت والقرآن.. والأنجيل.. والتوره
ولو طوحت شوفي عن خشاش الأرض يوم وحام
ماوكّر غير وكر تتعب الأنظار للطيوره
صباح الخير يا بغداد..وش سوى معك صدام
تبين الحق..؟؟؟ ما يزهى الزعامه غير اخو نوره