يا سيدي - شايع العيافي
ياهوى سيدي عسرك الحظ الاقشر وانت سيدي
فكرتي حارت وحيلاتي مع الساده عقيمه
الذواري لوحت بالروس والباس الشديدي
كل ما دارت هبايبها تجرعت الهزيمه
وش تسميها وانا الكايد ليا زعزعة كيدي
خيلت وامطر مطرها ثم لحق السيل ديمه
مال ميزانك مع الطاغي وقمت تمس قيدي
هكذا وانت المورى في نوايانا السليمه
ان لويت ايده تعصى وان عصاك اوميت بيدي
ليه ترضاها علي بالذات .. يامال الغنيمه
والله انك ماذخرت من القريب والبعيدي
كل دربٍ يغري اصحاب المراميع السقيمه
بس رد العلم عني .. للحبايب واطو قيدي
وقل ترا مشهور من كبر الخطا ذب الخريمه
بلغ الغالي يسوي ما يشاء وما يريدي
والله انا ماخلقنا لجل نرضى بالهضيمه
تنقص الهقوه وهقواتي تزيد وتستزيدي
في عهوده وارتباطات المواثيق القديمه
كلما يمم جنوب وصاح صيحات البليدي
جرني له سلك ود وجيت له حشمه وقيمه
يمه يسوق القدم ودٍ تعصّى لايحيدي
ماتزاود فيه عشاق الحكايا والنميمه
طمعة النازل وذاهبة المنوي بالشديدي
عوقي الصاطي..وخط الشيخ باوراق العزيمه
اشهد انه غير وانه غض عود وتلع جيدي
وانه افصح من يكلمني ولاغيري كليمه
عنده قلوب الحرار صبوط في حكم العبيدي
الهيام يسوقها صوبه وترجع به مهيمه
واشهد انه ند لعيوني ولاغيره نديدي
واشهد انه راعي الميسم وانا راعي الوسيمه
واشهد انه سم روحي ويتساقى في وريدي
كل ماعرض على قلبي تجرّم له جريمه
ايتقصوى فيه مدحي ويتجمل به قصيدي
ويتورع عنه طيشي لين يرضالي ظليمه
واذبحه ذبح الغلا وامده المد الزهيدي
لين يلعن هاجس ٍجاب الشياطين الرجيمه
واتحسف وانثني وآقول له ياسيد سيدي
اشهد ان امك عطاها الله ولا ماتت عقيمه