فلسفة ساري - شايع العيافي
سما نجد المسمى مره البارق مرور احباب
وشق الليل ستره ..بين نجد وبين غاليها
تثنت له رياحين الرياض وثنت الترحاب
وجات الفيصليه راسها من بين رجليها
لا والله قبل تاخذنا السوالف ماعلي عتاب
ترا من كان له عاده قديمه مايخليها
انا باحط يمناي الكريمه في يد الأرهاب
لكن ارهاب هذا الوصف عن روحي ومافيها
وانا اللي ماعلي خلاف سبع ومن سباع الغاب
ولاني مثل منهو يكحل عيونه ويعميها
ياليل البرد لا تاخذ علي ..وتدعي الغياب
واعقل لك ذلولٍ حبلها من فوق اذانيها
ليا منها سرت ليل الظلام وذلوا الهياب
حذفتك في نحرها والحفا يلحي سماريها
لنا صبرٍ على الشده ولك تقفيلة الأبواب
تمر الضيقه وتقفي على وجهك مواريها
يا هذا العالم الساحر ياهذا المنظر الخلاب
الى بابك تركنا اول الرحله وتاليها
اخذ كل العمر مده ويلامن شفت جرحك طاب
تذكر ساعة الرحمه ولاتنسى ثوانيها
عليك اقلط حبال المنى لا قلت الأسباب
مع بعض الحظوظ اللي تلاويني والاويها
واشوف دلال رسلانك ليامن ناشت المشهاب
وانا عابر سبيل اسمي العالم بأساميها
يانبراس العيون اللي تشككني وانا مرتاب
ترا الجمره على ماقيل تحرق رجل واطيها
لا بد انك على حاجه وانا من خيرة الأصحاب
اعرف العله اللي ماحدٍ يقدر يداويها
لكن اليوم ولا الصبح تفرش للقتيل تراب
وتذن بالصلاة اللي على الميت تصليها