يوه - شايع العيافي

يا عيونه من ورى البعد اشفعيلي
وانتي اغلى من يقلط للشفاعه

جاهك اكبر من مزبنة الدخيلي
وسرك اوثق من مواثيق الوداعه

اغضي رموشك على موقه وسيلي
وانشديه من الغلا وشلون اضاعه

وعلميه انه قبل يقطع سبيلي
ماعطيت اهل الهوى سمع وطاعه

معه اضيع واتبرا من دليلي
ومنه اذل ويصبح فوادي رعاعه

يوه من ظلمه مع الصبر القليلي
ويوه من ليله وساعه عقب ساعه

ويوه يا هرجه ويا كثر الذبيلي
ويوه ياصوته وياقل استماعه

ويوه يا مده وياشح الحصيلي
ويوه من ذكر المواصل والقطاعه

يا عيونه : سامحيني واسمحيلي
والله اني متعته واني متاعه

وان نقض عهده وخليته قبيلي
جعل كفي مايعدّي من ذراعه

ياعيونه ما نست حاشد بكيلي
لو نسى التاريخ وش سوت قظاعه

ليت ولا عل يالطرف الكحيلي
تاخذه بالمنع والا بالمناعه

محمل في موجة الغبه يميلي
ومع مجاديف الغرام اطلق شراعه

مبحر بين القصير والطويلي
يمته قلبي وحمل الشوق لاعه

عامله هم السهر وانا عميلي
موقفي بين الثنيه والرباعه

ينتهي مشوار دمعي في شليلي
وكلما عزيت قلبي فيه صاعه

الهوى لامزهبي ولاصميلي
مقنع نفسي وانا راعي قناعه

الهوى عز يلابس كل جيلي
اشتريته لو قليل العرف باعه

بيني وبينه ولو ضيع جميلي
مايضيق الكون من عقب اتساعه

شط بي عن ود نسّاع الجديلي
كنهن عقبه خوات من الرضاعه