مع الود - شايع العيافي
مع الود ميعادي حروف ....
وميلة نسيم الليل ياشجرة الراكا
ازبن عليك الود وأطرح لك الآمال
وأطارد سرابك وآتثنى لبلواكا
عبر والعبر تضرب لبعض العرب أمثال
وانا أعمى رشد والا مسميك سماكا
يتوه المدور والبلا شيرة الجهال
ويقفي بحسراته على غير رؤياكا
مابين الجدي وسهيل والحل والترحال
تغيب النجوم البيض وتغار الأفلاكا
انا ذقت منك الود والود ماينطال
وتالي مشاريبه تشره على فاكا
حديث الغلا بالشوق يركع مع الأذلال
يقول ان شرواي الغلا وانت شرواكا
الى اقبل عتيم الليل في العصاري مال
ومال الغرام بميلته دون لاماكا
سبحت البحر كله وجريت لك موال
وقلطت لك حدب الحنايا ترجّاكا
اسيرك هنا يشكي من الظلم والأهمال
تقول انه قد شافت عيونه محياكا
معك تجزع حروفي ووسع عليك البال
وادور مدد سلوى خفوقي بسلواكا
عطاك الكريم القادر الواحد المتعال
هوى مضغة منها حرمني واعطاكا
انا التايه الغادي ورى كاشفين الفال
والا اعرف غير اني احبك واهواكا
يجوز..!! أتبسم لابدا للثقيل هبال
وتضحك من البلوى عساها تبلاكا
اسميك غلطة روح....... واقفي وانا رجال
واعود وانا مشغول اياي اياكا
ذبيل الحكي لاسلم راسك ياراس المال
انا من ورى الغبه وعيني لمرساكا
عسى لي من الحظ الصخي واهب لازال
قبل موتك بعيني وتخليد ذكراكا