مسرأ - صالح الداغش
ما قلت لاتسري ترى الليل بدري
الليل يجمع بالهوا كل الاحباب
لو طلت عمرك وانت لو طلت عمري
رسمت كل العمر مخطوطة كتاب
تقرا مثل ماينقرا كل شعري
نطرب لها فرحه ونرقص بها إعجاب
ياصاحبي مازود العمر هجري
ولاقصره لقيا ولاجمعة أقراب
تركت بيدك فا لهوا كل أمري
وتركت بيدي من ندا ريح الأطياب
سألت ويش قد الغلا قلت :كبري
وأنا كبرت أكثر من العمر طلاب
سجنت عشقك للمدأ وسط صدري
وأغلقت من دونه شبابيك وأبواب
رحلت لكن باقي أقتات صبري
ليته يكفي قد حاجتك لغياب
فكرت بك وأنقاد للحزن فكري
غنيت بك والدمع من عيني أنساب
رسمت وجهك بين كسري وكسري
يطيب كسر وينكسر كل ما طاب
مادام ثغرك ماروى نهم ثغري
ليت العطش يرقى إلى جفن وأهداب
قبلت عذرك وأقبل الحين عذري
مايجرح العاشق سوى جرح الأحباب