صالة الإنتظار - صالح الداغش
في المطار
نلفظ اشياء المدائن
نوقظ التذكار
نبكي اكثر مماكان الحزن فينا
ونفرح احنا قد ما للحب فينا
في المطار
لاخيار الا الرحيل
اه ياحزني النحيل
ويش بيدينا
***
صالة الانتظار
اول اعتاب السما
بوابة القادم المجهول
المكان اللي بلا ماضي
بلا تاريخ
خارج مدى الجغرافيا
جزء من عالم المريخ
***
صالة الانتظار
اكبر مساحه للعواطف
للبكا المالح
للأنا الخصبه
للبسمه اللي تغيب وتجينا بلا طاري
للي نسانا من امد
واللي ماتذكرنا ابد
واللي لقيته خلف سور الذاكره يبكي حزين
ليتي
ياليتني
مالقيته الى الحين
***
في المطار
اه يامحلى الصدف
تاخذني عيوني الى عيوني
بلا داعي
ولا حتى هدف
نتجاذب اطراف الحديث
ليت ماله لانهاية ...
ولا أطراف
ليت السفر مايسجنه
في ثغره البارد الشفاف
واسافر
وانا ارقص على صوته
متورط بعطره
النافث الى صدري
واحسه داخلي ينشاف
***
صالة الانتظار
نجمي الغارب ورى شفة نهار
اغمق خط داكن
في قوائم التذكار ..
باختصار
صالة الانتظار
اكبر مساحة للحياه
داخل اقفاص الحياه
باختصار ..