ثنائية الحزن والطين - صالح الداغش
ضج المساء.. واستيقظ السهد ويني
يا فرحة الظلما أنا صرت من نور
لو هو لقاله بيت مالاذ عيني
ولو هالفضاء ارحب تشكلت عصفور
هذي ثنائيات حزني وطيني
نخلق أوادم لكن أرواحنا طيور
ولو هالسحاب اللي يلامس جبيني
يشرب ظماي امطر مواويل وشعور
حبيبتي شكي يساور يقيني
ان الفراق اللي يواريك معذور
وان المسافه بين قلبك وبيني
ثلثينها الاصعب اكاذيب وغرور
وش هو بقى بي حي.. وش مات فيني
سؤال ياخذني معك خارج الطور
انا الوحيد اللي تناثر حنيني
قبل الخريف اسقط وريقات وزهور
لمي عذاباتي وشعري وانيني
خلقت انا من طين ما خلقت من نور