ورى ما تسلم - صالح السبيل
ورى ما تسلم يابعد نور هاك النور
ولوهن ثمان بنورهن ما سون نوره
لهن طور وانت من البها صاير ٍلك طور
سليل اسرة ٍ بالملح والزين مشهوره
بغيت اتكلم لي بكلمه وخمس اشهور
وهي تدّرج مابين الاضلاع محصوره
لزمت السكات ولو تماديت به معذور
بلا مرّتي من بعض الاحوال ممروره
انا خابرانك في قرار الرضا مجبور
وعسيرٍعلي افزع ولا اصيربالصوره
مضالي ثلاث شهور والحال في حادور
اجامل واخفي هاجس القلب وشعوره
عسى الله يعبر جالبوتي دخلت بحور
ابو دفة ٍ من صفق الامواج مشعوره
إلى سلم ابا اركز بيرقي في علو القور
والى غرق سكه قبل ماعيش ماثوره
لوانه بعيد ارسلت من يقطعون البور
ولاهمني بعض المخاليق وسبوره
ولكنها دعوىً خذ تني بدون شعور
مفِرق الوردان والقلب ممهوره
معي فالبلد لكن عن جيته مقهور
ولو عبرتي في داخل الحلق مكسوره
قبلت الشقا والهم من شانها والجور
قدر والقد ر فيه المخاليق مجبوره