عساي - صالح السبيل
إلى العزيز على القلب خالد الحميدي :
يابو مشاري ما تفيد المناديب
لا صار ما للشخص حظٍ يشدّه
حظٍ يحطه في علو المراقيب
وبابٍ يشوفه ما يناسب يسده
مهوب مثلي يقرب الحظ ويغيب
والى حضر يبطح على القاع خدّه
يبرك واقوم الى اوجبن المواجيب
ولا علي لو كان ممشاي ضده
يالله عسى لي طيب واقدم الطيب
ويصير لي بعيون ربعي مودّه
وعساي ما انزل في عيون الاصاحيب
ومبنا بنيته يا عساني ما اهده
وعساي ما اطى العيب والشك والريب
وانصح بمسعى خير واركض والدّه
من شان يبقى الشيب ما خالطه عيب
والرجل ثوبه واجب يصير قدّه
والسر لو هو في صدور الاجانيب
انشد ويظهر لك دفينه مردّه
يا طير ياللّي لك جناج ومخاليب
ولك نظرة لا رجت بالحوم حدّه
قلي ورى الغواص ماتله السيب ؟
ما سره المحار لوهو يعدّه
ليته صبر ويشوف وش فالدواليب
ان جاز والا العيب عداه عده
ترى الخطيّة كنها شقة الجيب
مثل الجمل لا صار عضّه ببده