لا تبحث الوضع - صالح السبيل
لاتبحث الوضع خل الوضع يا سامي
بعض المواضيع ما حبه ولا اطيقه
ما جافالايام راحن فيه الايامي
ويبقى لي الهم والهوجاس والضيقه
حطيت سري ومكنوني والاحلامي
في قلب طيرٍ تفلت من مسابيقه
فز وتنكر وله عامين قدامي
عينه تطالع لسنجار وشواهيقه
حوّم وقفى يرفرف عقب ما حامي
والشمس غابت وصقاره على ريقه
وعديت في مستقلٍ نازحٍ زامي
ادلّه القلب لاتابس معاليقه
من واحدٍ فالهوى له مخلبٍ دامي
يرمي ضحاياه تغريبه وتشريقه
خذني وحنا بحكم وشرع الاسلامي
وشربت غيّه غلا وعجزت لافيقه
وراعي الموده تلاعب فيه الاوهامي
يزرع بالحلام شيٍ صعب تحقيقه
كم قلت له يا سحابٍ رايقٍ هامي
عشبه تغاير نواويره زماليقه
يا مصدر الهامي اللي صارت الامي
الشعر عوجٍ بدون اسمك طواريقه
لو عشت فالبال عامٍ من بعد عامي
الوقت يا عجل تجميعه وتفريقه
يا خال ما بين عذالي ولوامي
واقفاية اللي يماري في عشا ريقه
شف لي طريقه تراي عجزت لانامي
اردّع الدمع لين اعجزت واريقه
تكفى تسبب لعله يارد الضامي
ويوفق الله تفتح له مغاليقه