لوعة الأيام - صالح السبيل
أنا والله إني طبت من لوعة الايام
ونسيت البروق اللي عيوني تخايلها
تركت الغرام وجزت من طردي الاوهام
ونسيت البيوت اللي بها العام قايلها
وجفيت الورق وشوي واكسر الاقلام
لو إني سلمت ولا رجعت لرسايلها
تذكرت والذكرى تحدك على الاحلام
والاحلام حيلة روح واقرب وسايلها
أسلي بها الخاطر واسير بها الاقدام
واداوي بها كبدٍ تزايد غلايلها
على اللوم ما تصبر ولو ينصح اللوام
ورى ما يشوف لعدلها قبل مايلها
ورى ما يشوف الهجر والظلم فالاسلام
ويشوف إنها راحت ضحية محايلها
على كيفه العاذل وانا ماشي قدام
أدور عليها ما شقيت ببدايلها
غلاها على صدري لو انه يحط وسام
لبسته وقلت ان العمايل عمايلها
خذتني على غرة وساقت علي هيام
وانا سقت لي قاف لعب مع جدايلها
لو إن الأماني صدق غنيت يا سلام
ونسبت الوفا والجود لاطرف شمايلها