تحت السواهي دواهي - صالح الضويحي
من طبعهن.. من سجاياهن.. ومبداهن
تحطيم الآمال ..بين ايدين مغليهن
لو تحسن الظن في خافي نواياهن
سمر الدواهي تخفيهن سواهيهن
ولو تعمل المستحيل لتكسب أرضاهن
لاتحسب أنك .. بماسويت ترضيهن
ياللي تعجبت من ظاهر سواياهن!
من شأن ترضى ياليت تشوف خافيهن ؟
أن سولفوا ؟ سولفوا لك عن ضحياهن
تلعن دروبٍ أتوصلك لحراويهن!!
ولو تنشد أدنى الجروح ..وتنشد أقصاهن
لقيتهن منهن أولهن.. وتاليهن
تدرون منهن ؟ هن اللي قلت بأغلاهن
عذب .. بيوتٍ تسامرني معانيهن
حوريةٍ لاقبلت بعيونها .. تَاهن
أجمل بيوت القصايد قبل أغنيهن
هي درة الغيد بعيوني هي أحلاهن
هي تاج حاضرهن الغالي وماضيهن
عشقي لها.. أعيد فيه العهد.. وأراهن
على أنها الباقيه.. والغيد ما أبيهن..