الثلاث الشوارد - صالح الضويحي
عليك اهيم من الظما كل ماغبت
تبعد واجيك بصدق الاحساس وارد
ماكنّي الاّ اجدد الجرح لاطبت
يا اغلى الثلاث اللي بذهني شوارد
ذنبي وتبت.. وعنك عن توبتي تبت
لو تبعد ابعد من مجرّة عطارد
غريبه؟ انك كل ما ابعدت قرّبت
تبقى الوحيد اللي للاحساس فارد
وش جدّ لاقلت اني اغليك وش جبت
وأنت الجواهر.. والغلا.. والزمارد
جاملت..جيت..اقفيت.. صديت..عاتبت
تبقى السؤال اللي به الفكر شارد
قلبٍ ماهزّه صوتك العذب لأطربت
بليد واحساسه كما الثلج بارد
مدري تهيالي لك ابديت واعجبت
والاّ عشقتك وأنت للسيف جارد
مدري هو انت اللي بجرحي تسببت
والاّ انت جرحي والخواطر توارد