ياخالق أجيالٍ - صالح الضويحي
ياخالق أجيالٍ ويامفني أجيال
يامن جعل بالموت كامل عظاته
من بعد ذكره لي حكم المثل آل
وآلت معاني نشرته بكلماته
ورسلت لي مرسال مع طيف الأطلال
من رمس هجسٍ زارني بغفواته
للشاعراللي كان شاعر ولازال
يلعب على الموال بمساجلاته
والروض الأخضر ممحلٍ قاعه امحال
ذاري هبوب الريح شالت نباته
يابن ضويحي مابها اجدال وأشكال
الحق واضح ماتزعزع ثباته
قل صح مازليت ياطيّب الفال
هذا كلام الصدق ومقدماته
من واحدٍ لاغاب عنكم بالأعمال
عوّد عليكم في لغاه وشماته
متفرغٍ للحكي من ضيقة البال
عاف الكلام الزين وأفخت شتاته
تمذهبت ذيك المدايح والأمثال
ماشاف منها فائده في حياته
راحت كذا مجآن وأشغلني اشغال
هاجس ضميرٍ مأتعالج نياته
ونويت أعاتبكم على شأن من قال
وين القصيد ووين راحت أرواته
وأرسلت لك قدام لأزعلك مرسال
مرسال طيب وشاهده منجزاته
أنجز عمل مامال دربه ولاعال
على وضوح الشمس راحت وجاته
وأنته تبيها أقفاي وأمهال وأقبال
والليل لأظم ماأفلحت به رماته
وأنا بعد مثلك على كل الأحوال
لو كان راع الطيب مثلي صفاته
ياشاعرٍ تلعب على كل موال
سامح رفيقك لاتسوي اسواته