ضاق المدى - صالح الضويحي
ضاق المدى من ماطرق مهجة الجوف
والعين غفوات الكرى ما أهتنتها
بين أحتباس نفوس ومزارق سيوف
الروح دكلات الروابع غزتها
تحاضبت بالجاش طوفٍ وراء طوف
حتى الجبال الراسيه زلزلتها
وأرزم رعد دهمٍ مظاليل وأقنوف
واللي ذكر(كنعان) في طارفتها
بقبالها بشرى وبدبارها خوف
للي محابيل الشبك ناصبتها
النفس ماترضى على شي معيوف
وتغوي وتوهم من تبع عاطفتها
دارت هجوسي بين وديان وكهوف
وشم الجبال الشامخه عانقتها
غنى لها طير السعد وفق وسعوف
وعلى صدى صوته سرت قافلتها
أسرجت خيل وصحصح البيد مكشوف
حتى اظهرت لي بالزز سابقتها
جت السوالف عدة انواع واصنوف
وأخذت عن كثر العلوم أثمرتها
وأسندتها للي به المجد موصوف
قيدوم ربعٍ سيرته شرفتها
أبو محمد طيّب الصيت معروف
نفسه سمت للطيبه وأحتوتها
طلق الحجاج بوجه زوار وضيوف
تنفق يمينه والكرم من صفتها
مفلح الياعدوا هل المجد به نوف
مواقفه كل الرجال أعرفتها
ديوان بيته وسطه الجمع مألوف
وسيرة وفاه المخلصين أذكرتها
والمدح باللي يرفع الرأس مخلوف
وإلاّ أنذال القوم كلٍ شمتها
والشعر له ذوق وله الطرق معزوف
مآثره لنا العوارف روتها
ماهو مجرّد هرج مروي ومصفوف
أحساس روحٍ صادقه موهبتها
وأنا بديت وحدّني طرف مطروف
سبر السبور اللي علي أرسلتها
يوم المعاني ساقها فكر عيروف
ليه الرجال الفاهمه حرفتها
عبّرت والماقف له أحوال وظروف
والناس قالوا تختلف ذايقتها
ما أحسب لها قنّاص في حد مهيوف
واثق وكم نفسٍ رمتها ثقتها
أنا المجيب لدعوةٍ مابها أوهوف
دوعة شرف وأهل الشرف قدرتها
ماجيت متعدّي ولاجيت مزهوف
ونفسي حقوق الغانمين ألزمتها
من شأن ابن ناصر تعنيت مكلوف
لولاه رجلي خطوتي ماخطتها
جيته وأنا في حب الأخيار مشغوف
اللي عتيقات السلوم أحتمتها
والعود الأزرق فاح والبن محيوف
وطابت انفوسٍ طيبها من سمتها
في مجلسٍ صنف الذهب فيه مصروف
يوم القصائد نارها سارجتها
فاحت صدور وصفقت بعدها كفوف
ووجيهنا الفرحه بدت وأعتلتها
بحضور ربعٍ باللقاء تدحم الخوف
طرق الملامه من قديمٍ عدتها
مابه كلامٍ قيل ياحيف مأسوف
أصحابنا ليه الخيول أسرجتها
دام الستار اللي على الرأس منسوف
رمز الثقه ماحدٍ طلب بيّنتها
قلته وحطيت الهدف فوق شفشوف
عن رامياً صد النظر من جهتها
لومي على اللي يفهم العلم وأيشوف
صفّق وبغيابي حبك سالفتها
حط النقاط ولاوضع حولها احروف
وأمة محمد تعتزي في لغتها
والناس لهم أهداف وأنظار وأنهوف
لكن قوانين العرب حاكمتها
والهرج بغياب الرجل عيب منقوف
والله وعد بأهل النفاق ومقتها
وسلومنا وأسلومكم مابها أوهوف
فيها شرف وعقولنا مانفتها
وصلوا على اللي بأفضل الخُلق موصوف
اللي هدى الأمة وجمّع شتتها